Lakbay Sanaysay

Paglalakbay sa Asya

Abril 2019, nilakasan ko ang aking loob at naglakbay mag-isa patungo sa ibat-ibang bansa sa Asya. Ito ay naging isang malaking hamon para saakin na nag-iwan ng mahahalagang aral tungkol sa reyalidad na nasa labas ng ating bansang Pilipinas.

Inumpisahan ko sa Singapore patungong Malaysia, Vietnam at sa mga karatig nitong bansang Myanmar, at Thailand. Iisang kontinente man, maraming pagkakaiba parin ang mapapansin mo sa mga bansang ito. Nagtataasan at naggagandahang mga imprastraktura na ibang iba sa makikita mo rito sa Pilipinas. Kagaya ng Marina Bay Sands sa Singapore, ang Petronas Twin Towers sa Malaysia at mga templong naglalakihan sa Thailand. Samu’t saring mga lahi at rasa rin ang nakakasalamuha mo araw-araw. Ibat-ibang lenggwahe na nakakawiling pakinggan.

Ito ay isang pakikipagsapalaran na nagturo saaking maging independe at matuto sa pakikipagsalamuha sa ibat-ibang klaseng tao at lugar. Ipinamukha nito saakin na ang kinagisnan kong Pilipinas na puno ng kasiyahan at ginhawa ay iba sa mga bansang napuntahan ko. Ngunit napatunayan naman nito na napaka ligtas ng ating mundo at may kabutihan paring nabubuhay sa mga puso ng mga tao hindi man pareho ang lahi at bansang pinagmulan.

Sa huling bansang pinuntahan ko, ang South Korea, nagkaroon ako ng realisasyon na hindi lamang Pilipinas ang maari kong matawag na tahanan. Sa isla ng Jeju sa Korea, naparamdam saakin ng mga tao roon na tanggap ako sakanilang bansa. Nakakausap ko ang mga tao roon at natutuwa silang malaman na isa akong turistang mahal ang kanilang bansa. Maraming eksperyensiya at aral akong natipon sa halos dalawang buwang paglalakbay ko. Lakbay na naging susi ko upang mabuksan pa ng tuluyan ang aking puso at utak sa reyalidad ng ating mundo. Lakbay na naghubog saakin upang mas maging responsable at mabuting mamamayan ng hindi lamang Pilipinas ngunit ng buong mundo. Ito ang  aking paglalakbay sa Asya.